Stranbêjo

Gotarên Têkildar

Zanîngehên Amerîkayê di ber xwe didin

23/04/2025

Meqamê lîdertîya Vatîkanê vala ye

22/04/2025

Misir û Qeter ji bo Xezayê planekê pêşkêş kirin

22/04/2025

 

Enstrument di dest de

Mîna ku çêkerên hûngiv li kulîlkan bigerin

Helbestan dipelînin pêçiyên te

Wisa li min nenerre

Zarşîrîn û diltenik

Rûmetnasê kedê yî tu

Bila hesp dêla xwe diyarî kemanê bike

Sîsirk tevî meqamê xwe

Şalûl û bilbil xwe saz bikin werin

*          *          *           *  

Stranbêjê warekî wêrankirî yî tu

Naxwazim barê te giran bikim

Ji min re

Sî bemolê di çel bermîlan de bikelîne

Notaya pêr li do-re-mî‘yê zêde bike

Û ji hev veçirrîne perdê

Bila ne diyez zanibe li ku ye

Ne jî nifta çep kîjan solê têxe pê

Mal û halê dinyalikê

Zengiloka şeroyê biro deyne ser

*          *          *           *  

Nehêle dilê yekê jî bimîne

Ûd piano saksofon

Bilûr û tembûr

Hawara pepûkê

Şîrqîna brûskê tê de

Qitik qirdîlek

Hût û Nehît lê kom bibin

Mî berxika xwe şîr bide

Fa bibe zurafa

*          *          *           *  

Stranbêjê warê wêrankirî

Bêhna şewatê tê ji dengê te

Bigire derî li ser xem û fikaran

Kesê kirasê celîbûn û tenêtiyê lixwekirî

Dikane jînenîgariya felekê binivîse

Xeberê bigihîne xweşiktirîn çavreşa cîhanê

Dilketiyê têla gîtarê birîndar e

Bila çend ta por bişîne

*          *          *           *  

Duayên ewliyan

Qesîdeyên hezkiriyan in stran

Şûjdê bernadin serên helbestvanan

Dibêjin dilê lalo ketiye layê

Lê la tim ji bênamûsan hez dikin

Û tebîetekî jiyanê ye ev

*          *          *           *  

Stranbêjo

Li rûkala vê porkurra gerdûnê

Xayîntir û xapînoktir nîne ji zurriyeta adêm bi wê de

Berê bi muzîkê dihatin dermankirin nexweş

Nuha pêwîsttirîn beşa lezgîn nezanîkujî

Nayê peydakirin li tu nexweşxaneyan

*          *          *           *  

Biêştir deng bihîstiye te gelo

Ji yê ku kula kezebê dîtiye

Bila zarokî be aliyekî wê

Û tu carî neyê kuştin

‘Hilindir milindir law ji bavê bilindtir‘ bibin

*          *          *           *  

Întro talankirina mejî ye dema dikevin derekê dagirker

Di nîvê her taxê de minare û dibistanan diçikînin

Bilind dikin standarda ehmeqiyê

Bila mêrxasî jinxasî be strana te

Es xwe biavêjin ber tekerê bişaftinê

Re rê bigirin oktav biteqin

Nekeve devên biçûkan zimanê jahrdaran

*          *          *           *  

Stranbêjo dîno gêjo

Şerr şorreş qiyamet e îroj

Bila ev stran ne stran be

Yan jî stran ne ev be

Li ser pêla dil û dilodîntiyê

Veke çavên koran

Ûjdanên çavsoran

Mişk û mar

Destar û keftarr

Ên li pey çeqçeqê heta bi yên galaksî şaşkirî

Hemû zindî pê bihesin ku

Di vê cîhana li asîman ji gunikê kelmêşê biçûktir de

Welatekî bi navê xwe kurdistan jî heye

Û

Li vir neqede tofan

Ava serê mirinê bikele

Boçika zurnê di firnikê atomê de bialiqe

Xweda bikeve bi ser bêhiştî û konetiyê de

Ne ker herrin cîhadê

Ne rovî mirîşkan bidizin

Û stran tenê di ber hezkirinê de can bidin

Zürich, Payiz 2015

Foto: Wêneyê “Gîtarjen” ê Pablo Picasso

——————————————————-

Kî ye Cemîl Denlî?

Di sala 1968an de li gundê Diemê yê Qoserê hat dinyê. Dibistana seretayî li vî gundî, a navîn û lîseyê li Qoserê xwend. Herî dawî li Enqereyê li Zanîngeha Hacettepeyê Beşa Ziman û Edebîyata fransî xwend. Nivîskar di 1996-97an de wekî redaktor, nivîskar û wergêr li kovara Jîyana Rewşenê xebitî. Di sala 1999an de di weşandina kovara qerfî Pîneyê de cîyê xwe girt. Nivîsên wî di vê kovarê de di quncika Tara Bêjingî de hatin weşandin. Cemîl Denlî ji bilî kurdî û tirkî. b, zimanên îngilîzî, fransî û almanî dîzane. Denlî ji sala 2000î û vir ve li bajarê Zurichê ya Swîsreyê dijî.

Berhemên Cemil Denlî:

• Tav û Leylan, helbest 2004, Bajar

• Sêva Delalî, qerf, 2005, Belkî

• Min Hêsîr Vexwarine ji Reşika Çavên Te, helbest 2012, Belkî

• Destûra Bê û Baranê: Helbesta Reşbelek, helbest 2014,Belkî