Infowelat Enformasyon Ji Bo Welat
Gotarên Têkildar
Her çar partiyên siyasî yên herêmî yên li Îspanyayê bi deklerasyoneke hevpar êrîşen dawî yên Tirkiyeyê û stratejiya wê ya çewsîner a li dijî hêzên demokratîk şermezar kirin. Belgeya hevpar ji aliyê Bloka Neteweperest a Galîsî (BNG) ya Galîsyayê, Namzetên Yekitiya Gel (CUP) a Katalonyayê, Yekitiya Gelê Bask Bibe Yek (EH Bildu) ya Welatê Bask û Puyalon de Cuchas a ji Aragonê ve hat îmzekirin.
Di deklerasyona 28’ê Tîrmehê de êrîşa Sirûcê (Pirsûs) wekî “êrîşeke fîzîkî ya li dijî piştgiriya enternasyonalîst” û “erîşeke sembolîk a li dijî projeya damezrandina alternatîfa civakî, aborî û siyasî ya şoreşger a li Rojava” hat binavkirin.
Stratejiya dewletê ya sistkirina kontrolên li ser sinor a ji bo rêxistina radîkal a îslamî di deklerasyonê de hat rexnekirin û hat diyarkirin ku “pêvajoya muzakereyên aştiyê yên ji 2010 û vir ve di navbera hikumetê û tevgera rizgariya neteweyî û civakî ya kurd de dihate meşandin bi tevahî sekiniye û hêviya aştiyê ji holê rabûye.”
Deklerasyon li ser “stratejiya çewsîner” a Tirkiyeyê sekinî û got ku ew “faşîzma fûndamentalîst a Dewleta Îslamî” û “şerê gel ê xwerêxistinkirî yên kurdan ê li ser navê jiyanê, wekheviya çandî, antîfaşîzm, demokrasiya radîkal û rizgariya jinê” wekhev dibîne.
Di deklerasyonê de bang li hikumeta Tirkiyeyê hat kirin ku bilez dev ji stratejiya xwe ya çewsîner a li dijî tevgera kurd û opsiyonên demokratîk û polîtîk ên ji bin ve berde. Herwiha ji hikumetê hat xwestin ku kesên hatine girtin serbest bên berdan û bi riyên aştiyane meseleyê çareser bike.
Di dawiyê de bang li civaka navneteweyî hat kirin û jê hat xwestin ku dev ji stratejiya xwe ya klasîk a bi tenê ji dûr ve temaşekirina pevçûnê berde û di vê mijarê de aktîf tevbigere.
Înfowelat
