Infowelat Enformasyon Ji Bo Welat
Gotarên Têkildar
Bûdîstên rastgir daxwaz dikin ku dewlet ji nû ve li ser kokên bûdîst bê damezrandin û hemû kêmarên etnîk û olî ji rêvebiriyê bên dûrxistin.
Tevgera neteweperest a bûdîst li Srî Lankayê dest bi belavkirina wêneyên ku tê de mesajên nefreta etnîk û olî tê dayîn, dike. Kêmarên tamîl û misilman ên welat ji ber vê kampanyaya cudaxwaziyê bi fikar in.
Di wêneya ku hem bi dikan û wesayitan ve hatine kirin û herwiha di medyaya sosyal de tê belavkirin sembola bûdîstên sînhalî şêrekî ku şûr di dest de ye heye. Lê di binê wêneyê de di dewsa “Sinhale” (sînhalî) de “Sinha-le” hatiye nivîsandin ku ev jî tê wateya “xwîna şêr”. Digel peyva “Sinha” zer hatiye nivîsandin, “Le” ku tê wateya şûr, sor hatiye nivîsandin û ev jî rasretast xwînê sembolîze dike. Kêmarên etnîk û olî difikirin ku ev gefeke li dijî hebûna wan e û dixwazin ev kampanyaya nefretê bê bidawîkirin.
Tê ragihandin ku kesên vê kampanyayê birêve dibin endamên tevgera neteweperest a bûdîst Bodu Bala Sena (BBS) ne. Rastgirên bûdîst difikirin ku ew li welat piraniya nifûsê pêk tînin lê siyasetmedarên xwedî paşxaneya pir-etnîk wan ji rêvebiriyê dûr dixin. Ev derdor daxwaz dike ku dewlet ji nû ve li ser kokên bûdîst bê damezrandin û hemû kêmarên etnîk û olî ji rêvebiriyê bên dûrxistin.
Sînhalî li Srî Lankayê koma etnîk a herî mezin in û ji % 74.88’ê nifûsê pêk tînin. Li dûv van bi rêjeya xwe ya ji % 11.2 tamîl û misilmanên ku ji %9.2’ê nifûsê pêk tînin, tên. Çend sal piştî têkbirina rêxsitina Pilingên Tamîl bi şerekî bixwîn, Srî Lanka dixwaze reforma destûra bingehîn ku li welat riya demokrasiyê veke, pêk bîne.
Înfowelat
