Infowelat Enformasyon Ji Bo Welat
Gotarên Têkildar
Baydemir ji paytext Waşîngtona Amerîkayê beşdarî nûçeyên kanala televîzyonî ya Kurdistan 24ê bû; li ser ekranan bang li cîhanê kir û ji civaka navneteweyî mudaxeleya lezgîn kir.
Di destpêka axaftina xwe de Parlamenterê Rihayê yê HDPê Osman Baydemir bang li neteweperwerên kurd kir ku bi erka xwe ya wijdanî ûneteweyî rabin; wekî dîplomatên dilsoz gelê kurd biparêzin.
Baydemir diyar kir ku hikûmeta Enqereyê tevahiya kurdan wekî dijmin hilbijartine, ji ber statuya kurdan a li Rojava li bajarên kurdan ev şer daye destpêkirin û pêwendiyên bi Rêberê PKKê Abdullah Ocalan re dane qutkirin; herwiha kurdan çi bikira jî piştî hilbijartinan ev şer dê pêk bihata.
Derbarê pêwendiyên kurdî-kurdî de jî Baydemir wiha got: ‘Tevahiya kurdan doza mafê xwe yê rewa dike, aramiya Rojhilata Navîn diparêze û têkoşînê dide. Bi baweriya min, heke tevahiya partî û aliyên kurdistanî ji bo bidestxistina mafên xwe yekdeng û yekreng bin, Waşîngton dê bangewaziya wan bibihîze û alîkariyê bide bidestxistina mafên gelê kurd.’
Derbarê rola HDPê û êrişên li dijî wê de jî Baydemir wiha got: ‘HDP partiyeke siyasî ye û ji hemû pirsgirêkan re çareseriyên siyasî dibîne. Mixabin hikûmeta Enqereyê ne tenê HDPê, hemû kurdan hedef digire û terorîst dihesibîne. Hemû akademisyen, huqûqnas û nivîskarên ku di çarçoveya mafên mirovan de aştiyê dixwazin jî terorîst dibîne. Enqere bi 2 awayan şerekî dijwar dimeşîne: ji aliyekî ve dikuje, dide koçkirin û wêran dike; ji aliyekî ve jî hevgirtina ji bo aştiyê dide parçekirin.’
Baydemir derbarê agirbest û rola Herêma Kurdistanê de jî diyar kir ku her du aliyên şer mecbûr in ku rojek ji rojan li ser maseya diyalogê rûnin; herwiha divê tevahiya kurdan bi taybetî jî Hikûmeta Herêma Kurdistanê qêrîna bajarên kurdan bihese û bide hesandin.
Jêder. Sputnik News
