Infowelat Enformasyon Ji Bo Welat
Gotarên Têkildar
Cengîz Demirtaş
Çalakgerên kurd bi çalakîyeke ji bo Rojava xwestin dengê xwe bigihînin Forûma Aborîyê ya Cîhanê. Di çalakîyê de li Davosê slogana “Yek e yek e, Kurdistan yek e” hat berzkirin.
Welatparêzên kurd ên li Swîsreyê bi çalakîyan êrişên li ser Rojava protesto dikin. Îro bi taybetî çalakîya li Davosê balê kişand ser xwe. Çalakgerên li Davosê kom bûn, xwestin dengê xwe bigihînin Forûma Aborîyê ya Cîhanê. Bi sedan kesên ku li kolanên bajêr meşîyan, alên Kurdistanê, YPG, YPJ, QSD û KCK hilgirtin.
Di xwepêşandanê de li Davosê axaftinên ji bo piştgirîya bi Rojavayê Kurdistanê re hatin kirin. Axêveran gotin, êrîşên li ser Rojava ne tenê gelê Kurd, lê di heman demê de destkeftiyên demokratîk ên gelên herêmê jî hedef digirin. Axaftvanan diyar kirin ku çalakiyên ji bo parastina Rojava dê berdewam bikin û bang li civaka navneteweyî kirin ku tedbîran bigire.
Di çalakiyê de pankartên ku balê dikişînin ser qirkirin û berxwedana li Rojava hatin hildan. Gelek caran dirûşmeyên “Bijî Kurdistan”, “Bijî Rojava”, “Bijî Berxwedana Rojava” hatin berzkirin. Herwiha, bi sloganan hêrsa li hemberî El-Şara û Erdogan hat îfadekirin. Di dema meşê de mirovên li derdorê jî bi çepiklêdanê piştgirî dan çalakiyê. Çalakîya li Davosê bi slogana “Yek e yek e, Kurdistan yek e” bi dawî bû.
Di heman rojê de çalakîyeke din a girseyî jî li Kantona Cenevê ya li Swîsreyê hat lidarxistin. Bi hezaran kesên li paytexta kantonê Cenevê kom bûn, meşekê li dar xistin. Çalakgeran bang li civaka navneteweyî kirin ku bêdengiya xwe bi dawî bikin û berpirsiyariya xwe ya li hemberî bûyerên li Rojava diqewimin bigirin ser xwe.
