Infowelat Enformasyon Ji Bo Welat
Gotarên Têkildar
Ji destpêka Çileya 2026`an ve Bakur û Rojhilatê Sûriyeyê rastî yek ji pêlên herî xeternak ên aloziya leşkerî hat. Tevî ku hikumeta demkî rêzeagirbest û peymanên agirbestê îlan kirin, rastiya li ser erdê cuda bû ku bi êrişên berdewam ev peyman hemû hatin binpêkirin.
Ji destpêka Çileya 2026`an ve, deverên Bakur û Rojhilatê Sûriyeyê rastî pêleke xeternak a aloziya leşkerî hatin. Tevî daxuyaniyên siyasî yên hikumeta demkî yên “agirbest” û “çareseriyên aştiyane” hatine dayîn jî, lê rastiyên li ser erdê cuda bûn ku bi êrişên berdewam, şer berfirehtir bû û hemû peyman û agirbest bi awayekî sistematîk hatin binpêkirin.
Di vê raporê de, em ê bi berfirehî û bi awayekî kronolojîk rave bikin ka bûyeran çawa dest pê kir, şer çawa ji eniyekê ber bi eniyeke din ve û ji bajarekî ber bi bajarekî din ve berfireh bûye, û çawa agirbest tenê bûne sîwaneke siyasî û propagandaya medyayê ji bo rewakirina êriş û pêkanîna komkujiyan li dijî gelên herêmê, di serî de gelê Kurd.
4`Ê ÇILEYA 2026`AN: CIVÎN DI KÊLIYA DAWÎN DE TÊK ÇÛ
Di 4`ê Çileya 2026`an de, şandeyek ji Bakur û Rojhilatê Sûriyeyê civîneke fermî bi rayedarên hikumeta demkî re li dar xist da ku li ser yekkirina hêzên leşkerî di çarçoveya peymana 10`ê Adara 2025`an de nîqaş bikin. Li gorî çavkaniyên ji Rêveberiya Xweser, her du alî li ber îmzekirina peymaneke pêşîn bûn. Berî ku wezîrê karên derve yê hikumeta demkî Esed El Şeybanî destwerdanê bike, civînê qut bike û ji şandeya Koalîsyona Navneteweyî bixwaze ku biçe, paşê ji şandeya Bakur û Rojhilatê Sûriyeyê re got civîn bi dawî bûye.
5-6`Ê ÇILEYÊ: CIVÎN LI PARÎSÊ DI NAVBERA ŞAM Û TEL AVÎVÊ DE
Di 5 û 6`ê Çileyê de, civînek di navbera hikumeta demkî û Îsraîlê de li Parîsê pêk hat ku di heman demê de tevgerên leşkerî yên gumanbar li gelek eniyan pêk dihatin. Bajarê Dêr Hafir hate topbarankirin û çekên giran veguhastin derdora taxên Şêxmeqsûd, Eşrefiye û Benî Zêd ên Helebê. Saziyên sivîl ên li derdora van taxan jî veguherîn baregehên leşkerî.
6`Ê ÇILEYÊ: ÊRIŞÊN LI SER ŞÊXMEQSÛD Û EŞREFIYÊ
Di 6`ê Çileya 2026`an de, aliyên hikumeta demkî bombebaranek berfireh li ser taxên Şêxmeqsûd û Eşrefiye yên Helebê dan destpêkirin, bi bikaranîna tank, topên giran û dronan, bi piştgiriya rasterast a dronên dewleta Tirk ku Balafirgeha Navneteweyî ya Helebê wek baregehek ji bo rêvebirina êrişan bi kar dianîn.
Bombebaran deverên niştecihbûnê kirin hedef û bi sedan qurbanî çêbûn. Nexweşxaneyên Osman û Xalid di sibehê de hatin bombebarankirin ku ev binpêkirineke aşkera ya qanûna mirovî ya navneteweyî ye.
7`Ê ÇILEYÊ: DAXUYANIYA FERMÎ
Di 7`ê Çile de Fermandariya Giştî ya Hêzên Sûriyeya Demokratîk (QSD) daxuyaniyek weşand û piştrast kir ku Şêxmeqsûd û Eşrefiye ji 6 mehan zêdetir di bin dorpêçê de ne û li Helebê tu hebûneke leşkerî ya QSD`ê tune ye. Daxuyaniyê diyar kir ku îdiayên hikumeta demkî ya Sûriyeyê yên “gefên ewlehiyê” hincet in ji bo rewakirina komkujiyan.
9`Ê ÇILEYÊ: ÊRIŞÊN LI SER TAXÊN HELEBÊ BERDEWAM IN
Di 9`ê Çileyê de hêzên hikumeta Şamê êrişên xwe yên hovane li ser taxên Şêxmeqsûd, Eşrefiye û Benî Zêd berdewam kirin, bi bikaranîna tank, top û dronan û li wan deveran komkujî pêk anîn.
10`Ê ÇILEYÊ: HÊZA HEWAYÎ YA DEWLETA TIRK KETE ŞER
Di 10`ê Çileyê de, balafireke bêmirov a Akinci ya Tirkiyeyê li zeviya petrolê ya Sewra Başûrê Tebqayê da. Di heman demê de, bi dehan sivîlên ji Şêxmeqsûd û Eşrefiyê reviyan, li gel kampanyayeke tohmetên derewîn ên têkildarî qutkirina avê li stasyona pompkirinê ya Babîrî ya li rojhilatê Helebê.
11-12’Ê ÇILEYÊ: ÊRIŞ BER BI DÊR HAFIR Û MESKENAYÊ VE BERFIREH BÛN
Di 11 û 12`ê Çileyê de, komên hikumeta demkî ya Sûriyeyê êrişên dijwar li ser Dêr Hafir, Meskenayê û Bendava Tişrînê kirin, bi bikaranîna topan, dronên xwekuj û balafirên bêmirov ên Bayraktar û Akinci yên dewleta Tirk. Nanpêjxaneya Dêr Hafir, postxaneya Dêr Hafir û gundên Qeşla, Şêx Hesen û El Mehşiye hatin topbarankirin. Êrişên bi çekên giran di tevahiya roja 13`ê Çileyê de berdewam kirin.
14`Ê ÇILEYÊ: ÊRIŞA SÎSTEMATÎK LI SER BINESAZIYÊ
Di 14`ê Çileyê de, komên hikumeta demkî ya Sûriyeyê kargeha şekir a li Dêr Hafirê bombebaran kir, her wiha çend caran Bendava Tişrîn û bajarê Maskenayê çar caran bi dronan û gundê El Buasî yê li başûrê Tebqayê hatin topbarankirin.
15-16’Ê ÇILEYÊ: BOMBEBARANA BÊSERÛBER Û KOÇBERKIRINA BI ZORÊ
Di 15 û 16`ê Çileyê de êriş li ser bajarê Dêr Hafirê berdewam kirin, bi armanca koçberkirina şêniyan bi droneke bombekirî taxên niştecihbûnê topbaran kirin.
17`Ê ÇILEYÊ: PEYMANA VEKIŞÎNÊ HATE BINPÊKIRIN Û PEVÇÛNÊN BERFIREH DERKETIN
Tevî peymana navneteweyî ya ji bo vekişîneke birêkûpêk ji Dêr Hafir û Meskenayê ku ji hêla QSD`ê ve hatibû ragihandin, komên hikumeta demkî ya Sûriyeyê berî ku vekişîn temam bibe, ketin her du bajaran û êrişî hêzên QSD`ê kir. Ev yek bû sedema pevçûnan li Meskena, Dibsî Afnan, zeviya petrolê ya El Sewra û derdora El Rasafayê û êriş heta Tebqayê berfireh bûn.
18`Ê ÇILEYÊ: ÊRIŞ BER BI DÊRAZORÊ VE BERFIREH BÛN
Di 18`ê Çileyê de, komên hikumeta demkî ya Sûriyeyê êrişî El Xeranîc, Ebû Hemam, El Kişkiyê, El Zîban û El Teyana yên gundewarên rojhilatê Dêrazorê kir, di heman demê de êrişên li ser bajarê Reqa û gundewarên derdora wê û Kobaniyê berdewam kirin.
19`Ê ÇILEYÊ: AGIRBESTEK HAT RAGIHANDIN LÊ ÊRIŞÊN LI SER ERDÊ BERDEWAM KIRIN
Tevî agirbesta ku ji hêla serokê hikumeta demkî Ehmed El Şeri ve di 19`ê Çileyê de hat ragihandin, komên girêdayî hikumeta demkî êrişên dijwar li ser Eyn Îsa, Şedadê û Reqayê, bi taybetî li dora zindanên El Eqtan û Şedadê ku bi hezaran çeteyên DAIŞ’ê yên girtî lê ne, kirin.
20`Ê ÇILEYÊ: AGIRBESTEKE SAET 8`Ê ÊVARÊ LÊ BINPÊKIRIN BERDEWAM DIKIN
Di 20`ê Çileyê de, El Şeri agirbesteke çar rojî ya nû ragihand da ku peymana yekbûnê bi cih bîne. Lê topbaranê li ser bajarokên Zirgan û Til Barûd li gundewarê Hesekê berdewam kir û êrişên li ser bajarê Kobanî berdewam kirin.
AGIRBESTÊN SÎWANÊN ŞERÊ TUNEKIRINÊ
Ji Helebê heta Dêrazorê, ji Reqayê heta Hesekê, Kobanî û Tebqayê, aşkera ye ku tiştê ku qewimî ne rêzebûyerên takekesî bûn, lê belê kampanyayeke leşkerî ya berfireh bû ku ji hêla dewleta dagirker a Tirk ve bi navê hikumeta demkî ve dihat rêvebirin û ji hêla medyaya erebî ve bi rengekî cudakar hate piştgirîkirin.
Her peymanek ku hate ragihandin hate binpêkirin, her agirbestek ji bo berfirehkirina êrişên li ser herêmê û pêkanîna komkujiyan li dijî gelê wê hate bikaranîn û her soza kêmkirina aloziyê tenê sîwanek bû ji bo şer.
Nivîs ji Hawarnewsê hatîye wergirtin.
Foto: Komeke niştecîyên çekdar ên li bajarokê Til Temirê
