Infowelat Enformasyon Ji Bo Welat
Gotarên Têkildar
Wisa xuya ye wê piştî îstifaya Zoran Zaev, rekabeta siyasî ya li Makedonyaya Bakur derkeve asta herî bilind û Bruksel û Moskow ji bo bandorê li tercîhên vî welatî bikin wê di nava hewldanan de bin.
Ji meha cotmehê û vir ve mixalefeta Makedonyayê ji bo serokwezîr Zoran Zaev îstifa bike, li ser wî zextan dikir.
Zaev jî li hember vê kampanyaya dijber hew deyax kir û îstifaya xwe pêşkêşî parlemenê kir.
Bi vî awayî li Makedonyayê bû cara yekem, serokekî ku partiya wî hîn li ser kar e terka kursiya xwe kir.
Li gorî prosedûrên siyasî, piştî qebûkirina îstifaya Zaev ji aliyê parlemenê, divê di nava 10 rojan de hukumeteke nû ava bibe.
Ji ber ku Partiya Sosyal Demokrat SDSMê ya Zaev di parlemenê de piraniyê pêk tîne, careke din wê karê avakirina hukumetê pêşkêşî wê bê kirin.
Serokwezîrê Makedonyayê Zoran Zaev ji 2017’an û vir ve li ser kar bû.
Wî di dema xwe de dostaniya Amerîka û Yekitiya Ewrûpayê esas girt û Makedonyayê kir endamê NATO’yê.
Yek ji meseleyeke girîng ku Zaev çareser kir, krîza navê welêt ya bi Yûnanistanê re bû.
Zaev ji bo riya endamtiya Yekitiya Ewrûpayê veke, di 2018’an de bi serokwezîrê Yûnanistanê Aleksîs Çîpras re li hev kir û peymanekê îmze kir.
Zaev di dema rêvebiriya xwe de bi Albanya û Sirbistanê re jî têkiliyên xwe pêşxist û pêr li paytexta Albanya Tîranê bi serokomarê her du welatan re peymana Balkana Serbest îmze kir.
Dema piştî Zaev
Pisporên mijarê didin zanîn, piştî îstifaya serokwezîrê Makedonyayê wê partiya mixalif VMRO ji bo were ser kar hewldanên zêde bike.
Ev partiya netewperest li dijî endamtiya Yekitiya Ewrûpayê û NATO’yê û hevalbendiya Makedonya û Rûsyayê diparêze.
Wisa xuya ye wê di vê proseyê de rekabeta siyasî ya li vî welatî derkeve asta herî bilind û Bruksel û Moskow ji bo bandorê li tercîhên Makedonyayê bikin, wê di nava hewldanan de bin.
