Infowelat Enformasyon Ji Bo Welat
Gotarên Têkildar
A. Rahman Çelîk
Mudaxeleyên çalakiyên protestoyên li pêyî girtina Şaredarê Stenbolê Îmamoglû rastî reaksiyonên navneteweyî tê.
Brîtanya û Fransayê hişyariya demokrasiyê dan, Amerîkayê îşaretê bi bêîstikrariya Tirkiyeyê kir.
Brîtanya û Fransayê di der barê girtina Şaredarê Stenbolê Ekrem Îmamoglu û mudaxeleyên çalakiyên protestoyê bertek nîşanî desthilata Tirkiyê dan.
Herdu welatan îşaret bi serdestiya hiqûqê kirin û hişyariya demokrasiyê dan.
Brîtanya: Rûmetê bide nirxên navneteweyî
Di daxuyaniya Wezareta Karên Derve ya Brîtanyayê de hat gotin ku ew dixwazin hikûmeta Tirkiyê li gorî nirxên hevpar ên navneteweyî tev bigere û rûmetê bide serdestiya hiqûqê.
Wezareta Karên Derve ya Brîtanyayê li pêyî girtina Ekrem Îmamoglu pêşniyarên rêwîtiyê rojane kiribû û ji welatiyên xwe daxwaz kiribû ku nêzî qerebalixan nebin û xwe ji xwepêşandanan dûr bigirin.
Fransa: Em Tirkîyeya antî-demokratîk naxwazin
Di vê babetê de, daxuyaniyek jî ji Serokomarê Fransayê Emmanuel Macron ve hat.
Emmanuel Macron di lûtkeya li ser Ûkraynayê de şermezarî da êrîşên li dijî têgehên demokrasiyê, li ruyê cîgirê serokomarê Tirkiyê Cevdet Yilmaz got:
“Li Tirkiyê êrîşên li dijî azadiyan êdî bi awayê sîstematîk tên kirin. Demokrasî yek ji nirxên Ewrûpayê ye. Ewrûpa Tirkiyeke antî-demokratîk naxwaze.”
Amerîka: Bila hevalbendê me bêîstikrar nebe
Wezîrê Karên Derve yê Amerîkayê Marco Rubio jî li ser mudaxeleyên çalakiyên protestoyê yên li pêyî girtina Ekrem Îmamoglu dan destpêkirin nerazîbûn nîşan da.
Marco Rubio fikarên xwe yên li ser îstikrarê anî ziman, got: “Em naxwazin rêveberiya hevalbendekî me ewqasî bêîstikrar bibe.”
Komîsyoneke vekolînê diçe Tirkîyeyê
Geşedanên dawî yên li Tirkîyeyê di rojeva Kongreya Rêveberiyên Xwecihî û Herêmî ya Konseya Ewrûpayê de jî bû.
Kongreyê li ser destwerdana şaredariyên muxalefetê yên Tirkiyê, di rûniştina îroj de hat qebûlkirin.
Di danezanê de hat gotin ku di demeke herî kurt de wê komisyoneke vekolînê bişînin Tirkiyê wê daxwaz bikin ku bi şaredaran re rû bi rû hevdîtinê pêk bînin.
Kongreya Rêveberiyên Xwecihî û Herêmî ji rêveberiya Tirkiyê dixwaze rûmetê bide rêveberiyên herêmî û dawî li darizandin û girtina şaredarên mixalefetê bîne.
Foto: Çalakîyên protestoyî yên li Stenbolê
